عبث

الفصل الأول

المشهد الأول

في غرفة كبيرة تمتلئ بأثاث فخم وأنتيكات ثمة مكتب في وسط الغرفة تقع خلفه مكتبة مكدسة بالكتب وعلى كرسي المكتب يجلس زين الذي يغلق كتابه ويهم بالنهوض متجهنا إلى وسط الغرفة

زين: ينهار إسود إيه كل العلاقات المتشابكة اللي أنا فيها دي؟ واللي بتتشابك كل يوم مع بعضها أكتر من يوم اللي قبله؟

إزاي الحياة وصلت بيا للحظة اللي أنا عايشها دلوقتي؟ واللي مفروض هعديها للحظة تانية مع نهاية الجملة اللي أنا بقولها؟ كم علاقة دخلتها مع بداية الرحلة دي؟ وقد إيه بشر عدوا عليا عشان أوصل للحظة دي؟ وإزاي عرفت اللي أنا عارفهم دلوقتي؟ إزاي كل واحد فيهم خد حتة من روحي؟ إزاي اشترك كل واحد منهم في جزء من سيناريو حياتي؟ وإيه هي مساحة أدورهم وأهميتها في السيناريو بتاعي؟ بل إيه هي مساحة دوري وأهميتها في السيناريوهات بتاعتهم؟

كام واحد من البشر دول جرحني بقصد أو بغير قصد؟ كام واحد جرحته بقصد أو بغير قصد برضو؟ مين منهم كان ممكن يمثل الحلقة المفقودة في حياتي لو ما عرفتوش؟ ومين منهم كان هيعمل خلل وارتباك في السيناريو بتاعي لو ما قابلتوش؟ ومين منهم زي ما دخل حياتي زي ما خرج منها وما فرقتش كتير؟ طيب،

لو مدخلتش العلاقات دي كلها، ولو ما عرفتش البشر دول هل كنت هبقى واحد تاني غير اللي واقف دلوقتي يكلم ولا مكنش هيبقى فيه اختلاف؟

يسير زين ناحية جرامافون عتيق ثم يلتقط من جانبه اسطوانه ويضعاها عليه

زين: تحوت الحكيم بيقول: الزمن كالدائرة تتصل نقاطها حتى انك لا تستطيع تحديد أولها من آخرها حيث تتبع كل نقطة مما يسبقها وتتبعها ما تلحقها إلى الأبد إلا أن هناك فهمًا أعمق حيث ينسلخ الماضي ولا يكون أبداً والمستقبل لم يولد بعد ليكون، وحتى الحاضر لا يستمر، فكيف يمكن الجزم بوجوده إذا لم يكن ثابتاً لحظة واحدة.

أهو أنا بقا نفسي أعرف تحوت دا كان قاعد فين وقت ما كتب الكلام ده؟ هل كان ساند مثلا على واحد من التمثيل اللي بنشوفها في المتحف المصري؟ ولا في واحد من معابد الأقصر؟ وإيه كان مزاجه وقت ما كتب؟ بلاش.

مين هو الشخص اللي رمى البذرة دي في الأرض عشان السما ترويها والأرض تديها وتبقا شجرة تفاح ضخمة؟ وييجي نيوتن في يوم من الأيام أيام تحتها عشان التفاحة تقع على دماغه ويكتشف قانون الجاذبية؟ ليه نيوتن راح تحت الشجرة دي بالذات أصلا؟ وليه التفاح استنت لحد ما قعد ووقعت على راسه؟ طب بلاش كل دا.

ايه هي العلاقة بين فلاح معرفوش زرع بذر الطماطم و فلاح تاني روى الأرض و بين فلاح تالت رش الأرض بالمبيدات المسرطنة و بين فلاحة زي القمر قطفت الطمطماية دي من الأرض و بين واحد تاني بعها في السوق و واحد تاني شغال في المطعم اشتراها وقطعها طرنشات و قدمهالي على طبق مع باقي الأكل؟. ايه هي العلاقة بيني وبين كل دول بعد ما كلت الطماطمية وبقت جزء مني؟

طيب

هل أقدر أحسب عدد الأوراق اللي أنا قريتها أو كتبتها على مدار حياتي؟ أو عدد الاقلام اللي استهلكتها وبددت حبرها بدون أدنى رحمة أو شفقة على كلام عبيط؟ إيه هي مكوناتي بالضبط؟ كم تجربة في كم مجال؟ كم سجارة؟ كم كباية قهوة وكباية شاي؟ كم قدرة فول ورغيف عيش؟. كم صينية بطاطس في الفرن؟ وكام سانداوتش برجر؟

كل التشابك العنكبوتي اللي بتتكون منه خلايانا وأنسجتنا وحياتنا

كل التجارب وكل التساؤلات.

كل دا بنرميه ورا ضهرنا عشان نستهلك حياتنا في حاجات عبثية كتير بنشغل بيها عقولنا

زي الجري ورا الفلوس الهوس بالبنات، التفاهات اللي مبتنتهيش والفلسفة الفارغة والاشتغالات والهرتلة.

عبث كل دا عبث…

بش بعيدًا عن العبث خلينا نتساءل مع الشاعر بودلير

أين أصدقاؤنا الموتى؟

لماذا نحن هنا؟

هل نحن قادمون من مكان ما؟

وكالعادة… معرفش.

يخرج زين